Irutxuloko Hitza

Hamar urte joan dira jada Bidebietako gaztelekua zabaldu zutenetik. Auzoaren behar jakin batzuk asetzeko sortu zuten.

80ko hamarkadan ekonomi krisialdiak eragina izan zuen Bidebieta eta inguruko gazteengan; langabezia, eskolan edo familiaren baitan arazoak, droga-menpekotasuna ... Auzo elkarteak gazteentzat zerbait egiteko eskatu zion Udalari, Enpresa gunea sortu zuen Udalak aurrena —gaztelekua dagoen eraikin berean—. Dena dela, aisialdian gabezia zegoen eta testuinguru horretan, zabaldu zuten Kontadores.
Kontadoresko arduradunetako bat da Yoli Martin. Ia hasieratik dabil bertan lanean eta gaztelekuak izandako bilakaeraz hitz egin du: «Pozik gaude. Auzoko gazte gehientsuenek gure berri badute. Gainera, Pasaia edota Errenteriako gazte batzuk ere hona datoz. Eta ikastaroetan bada Tolosako gazterik ere». Auzora etorrita, haur txoko, elizako gazte taldearekin eta kale hezitzaileekin duten hartu emana azpimarratu du Martinek: «Auzoko haurrek, lau urtetik aurrera, badute nora jo».
Gaztetxoek jolastu, informazioa jaso eta hainbat ikastarotan parte har dezakete gaztelekuan. Ikastaroek gazte asko erakartzen dituzte. Eskaintza aldatuz eta areagotuz joan da: «Zeinek esango zigun duela hamar urte funky ikastaroak antolatu behar genituenik!», dio Yoli Martinek. «Argazkigintza ikastaroa izan zen lehenetako bat. Oraingo garaietara egokitu behar izan dugu gure burua eta orain argazkigintza digitala jorratzen ari gara: Hala ere, oraindik gazte asko datorkigu laborategiak erabiltzera».
Euskara gehiago erabiltzea beste erronketako bat da: «Informazio gunera auzokoak ez ezik, Donostiako beste hainbat auzotako gazteak etortzen dira eta haiekin errazagoa da euskaraz egitea. Gazteenekin, ordea zailagoa da, auzoko gaztetxo gehienek gaztelaniaz egiten baitutute; batzuk eskola utzita dira, beste batzuk A ereduan dabiltza... Oraingoz ezin izan diogu horri buelta eman».